AGALIN REIVINDICA O PAPEL DA INTERMEDIACIÓN PROFESIONAL ANTE OS RETOS ACTUAIS DO MERCADO DA VIVENDA
A Asociación Galega de Inmobiliarias defende un mercado baseado na profesionalidade, a transparencia e a seguridade para todas as partes, e reclama diálogo e estabilidade para afrontar os problemas de acceso á vivenda.
A Asociación Galega de Inmobiliarias (AGALIN) considera necesario trasladar á sociedade a súa posición ante a situación que atravesa actualmente o mercado da vivenda en Galicia e ante un debate público no que, con demasiada frecuencia, se simplifican problemas de enorme complexidade ou se atribúen responsabilidades ao conxunto dun sector sen distinguir entre prácticas, empresas e profesionais.
O acceso á vivenda é unha das principais preocupacións sociais do momento. A escaseza de oferta, especialmente no alugueiro, a evolución dos prezos e a incerteza derivada dos continuos cambios normativos están afectando tanto ás persoas que buscan unha vivenda como aos propietarios que valoran incorporala ao mercado. É unha realidade que as inmobiliarias coñecemos de primeira man porque acompañamos diariamente a ambas partes e observamos directamente como esas dificultades condicionan cada vez máis as operacións.
Os datos recentes amosan a necesidade de abordar esta situación con rigor. En Santiago de Compostela, por exemplo, a oferta dispoñible para alugueiro pasou en poucas semanas de arredor de 400 vivendas a pouco máis de 300. Profesionais de AGALIN advertiron tamén da paralización de operacións ante a inseguridade e a falta de certezas existente no mercado.
A intermediación profesional, parte da solución
Neste contexto, AGALIN considera especialmente importante explicar cal é o papel real dunha axencia inmobiliaria profesional. A súa función non consiste en crear a escaseza de vivenda nin en determinar por si mesma os prezos do mercado, senón en intermediar entre as partes, asesorar, verificar documentación, explicar dereitos e obrigas, negociar condicións e ofrecer seguridade nunhas operacións que son cada vez máis complexas desde o punto de vista económico, xurídico e administrativo.
A intermediación profesional debe contribuír precisamente a reducir a incerteza. Un mercado equilibrado necesita propietarios con garantías suficientes para ofrecer as súas vivendas e tamén inquilinos e compradores que reciban información clara, protección e unhas condicións transparentes. Presentar estas necesidades como intereses necesariamente contrapostos non axuda a solucionar o problema da vivenda.
Por iso, AGALIN defende un modelo baseado no diálogo e na seguridade para todas as partes. Máis protección para quen accede a unha vivenda e máis confianza para quen a incorpora ao mercado son obxectivos que deben avanzar conxuntamente se queremos aumentar a oferta e favorecer un mercado máis estable.
AGALIN: profesionalidade, responsabilidade e confianza
Esta defensa da intermediación inmobiliaria non significa xustificar calquera actuación realizada dentro do sector. AGALIN distingue claramente entre o exercicio profesional da actividade e aquelas prácticas que non responden aos estándares que a asociación defende.As empresas integradas en AGALIN comparten unha maneira de entender a profesión baseada na transparencia, a responsabilidade, a formación, o coñecemento do mercado e o respecto ás persoas que participan en cada operación. A pertenza á asociación implica un compromiso coas boas prácticas e cunha prestación de servizos rigorosa e profesional.
Neste sentido, o distintivo AGALIN representa algo máis que a pertenza a unha asociación empresarial: identifica empresas que comparten uns principios e unha determinada forma de exercer a profesión. Para propietarios, compradores e inquilinos, debe ser unha referencia de confianza, acompañamento e compromiso profesional.
Por iso consideramos tamén necesario evitar que actuacións individuais ou prácticas concretas acaben proxectando unha imaxe negativa sobre todo o sector. Defender a profesión inmobiliaria significa, ao mesmo tempo, defender a súa profesionalización e elevar permanentemente os estándares cos que se presta o servizo.
Estabilidade e diálogo para recuperar a confianza
O problema da vivenda non se resolverá mediante a confrontación nin buscando un único responsable. Galicia necesita incrementar a oferta dispoñible, especialmente no alugueiro, e para iso é imprescindible crear un marco que xere confianza e permita adoptar decisións con maior seguridade.
AGALIN considera necesario avanzar cara a unha regulación estable, comprensible e previsible, acompañada dun diálogo real entre administracións, propietarios, consumidores e profesionais do sector. As políticas de vivenda serán máis eficaces canto mellor incorporen a experiencia de quen traballa diariamente sobre o territorio e coñece de primeira man as razóns polas que unha vivenda entra no mercado, permanece nel ou acaba retirándose.
As inmobiliarias forman parte das cidades, vilas e barrios de Galicia e traballan todos os días con persoas que afrontan decisións de enorme importancia persoal e económica. Por iso, AGALIN reafirma o seu compromiso cun sector cada vez máis profesional, transparente e responsable e cun mercado no que propietarios, compradores e inquilinos poidan operar con maiores garantías.
Os profesionais inmobiliarios non somos alleos ao problema da vivenda. Estamos en primeira liña, coñecemos as dificultades das partes e queremos contribuír a atopar solucións. Ese é o compromiso de AGALIN e das empresas que forman parte da asociación.